陸羽仁--季結 2011/3/31

季結 2011/3/31  



美股開始衝高位。美國3月ADP私營就業人數增長好於預期，市場預計本周五出爐的非農就業數據將有所突破；美企併購的消息亦振奮投資者入市情緒，美股造好。杜指開市抽升52點，之後逐步攀升，最多升104點，尾市升幅收窄，收市報12351點，升72點，標普500指數漲9點，報1328點。杜指期貨最新報12281點，較現貨低水70點。



港股美國預託證券靠穩，ADR港比指數報23486點，比香港收市高35點。匯控收81.95元，比香港低5仙，中移動收72.11元，比香港高0.4%。



　　美國薪資服務商自動數據處理公司(ADP) 昨日宣佈，3月的私營領域就業較上月增長20.1萬人，略好於預期的20萬。資料顯示職位增加主要集中在公司人數少於50人的小型企業。服務業就業增長16.4萬人，係連續第15個月增長，而製造業增長3.7萬，係第六個月增長。最弱的是建造業，縮減了5千人，與2007年高峰期比較，建造業的職位大幅收縮了213萬個！



自AT&T提出提出收購T-Mobile USA以來，AT&T股價已經升逾一成，且連續多日高踞杜指升幅榜，令市場氣氛轉旺，加拿大製藥商Valeant Pharmaceuticals International樸昨日宣佈鹹以每股73美元現金敵意競購産治療睡眠障礙藥物和止痛藥的Cephalon Inc，涉資57億美元，消息刺激Cephalon瘋漲28%，Valeant Pharmaceuticals亦升逾半成。市場炒風熱烈。



若你信杜氏理論，美股仲要向上，因為杜指昨收12350點，直逼12391的收市高位，而杜氏運輸指數昨日已率先創新高，傳統杜氏理論話咁顯示杜指仲要再上創高位，而反映中小股走勢的羅素2000指數亦已率先上了2年半高位。



    主要相反意見係美股成交稀薄，美股由上周開始升，但成交一直少過月初跌市時，即係話走咗的人唔係全部入番市，美股只係在買賣兩閒中上升。成交唔多配合，唔係大幅創新高的格局。



若美股再創新高，點都會扯住港股向上。港股明顯比美股弱，今年距離新高好遠，上一浪高位近24000點，而家仲有500點左右距離。



    今日係第1季最後一個交易日，係時候做吓回顧前瞻季度表現，杜指今年至今升超過6%，係99年以來最好的第1季(港股第1季至今只升1.8%)。美股交易員對呢一季有咁大升幅，覺得好神奇，認為如果事先話俾大家知有一個日本九級級地震加核洩漏、大量中東國家在政變邊沿、歐洲債務危機持續，就無人敢估杜指可以升6%。美股有得升，主要係炒一個全球經濟和美國復甦的主題，背景係QE2聯儲局大放水令市場資金充裕。



第2季有幾件事要注意。第一，究竟呢個經濟復甦的故仔可否繼續? Oppenheimer基金的經濟師Brian Levitt 就話，佢睇到消費放緩後，要調低美國的GDP增長估計。再加上美國貿易赤字放大，資本投資又開始減縮，呢個經濟復甦的故仔未來可能無咁好賣。



第二，歐債危機咪當無到。在美股高升的情緒下，好似當歐債危機無到一樣，評級機構接連調低歐豬五國的評級無反應，葡萄牙國會否決削赤預算又無反應。若美股投資情緒一冷卻，歐債危機的心理因素必定重燃。



第三，真正變數在QE(量化寬鬆)。第二次量化寬鬆的影響比誰說的都大，自從聯儲局主席伯南克去年8月一宣布進行第二次量化寬鬆之後，美股就一直升無停過。美股反幅創高，但港股去年11月創高位後連跟唔上。美股交易員深信第二次量化寬鬆放出來的資金最後會流向股市，所以不斷炒，但事實上流入幾多無人知。既然第二次量寛影響咁大，佢6月到期停止，如果聯儲局不再進行第三次量寛(機會不低)，對市場的壓力幾大。



陸羽仁